作者: 旅客一位：阿諾爾

2023 新邁住宿新玩法

2023 年再次 #一個人旅行 ，為2022年畫上句號。今次唔係去日本滑雪、亦唔係曼谷 shopping ，而係到較冷門的清邁 #一個人旅行 。哈，又估唔到呢3年清邁多咁多新嘢玩 。

#通關 清邁飛機唔多。今次選搭 #hkexpress ，因為機票較平；酒店就用 #Booking.com 訂，因為驚臨時更改行程，而Booking.com 可以免費更改/取消訂單 。

抵達清邁國際機場已經傍晚，「喳喳林」搭車去湄林縣的 Phu Morinn Cafe and Camp。Check-in 之後，order 個清邁著名的豚肉火鍋；食材唔貴，但好新鮮，大份，好抵食，醫肚最好。

營地在湄林縣山區，附近是梯田同農莊。營地有幾種帳幕選擇，每個方案都有獨立廁所，乾淨，私隱度高。第一晚住球型帳幕，有戶外浴缸。晚上浸泡泡浴，飲杯嘢，望住星空；瞓在床上對住山景，好chill；第二晚瞓露營車，景觀冇咁好，不過自成一國，適合一家大細。提提你，清邁山區夜晚好凍，溫差幾大，最好帶多件衫。

營地職員好Nice，不過山區人多，英文唔係幾好，不過 whatapp 英文溝通都無問題。出發前最好要求佢哋安排車到機場接送，當然要另外收費，預咗。

湄林縣有好多呢種豪華露營 #gampling ，附近好有好多景點，例如士多啤梨園、湄薩瀑布、大象營等。好多人到清邁只喺市區入邊玩，其實湄林縣都好多嘢睇，最好方法就係包車一日遊。

三日兩夜好快過。喺湄林區豪華露營，腳步放慢咗，睇吓日出日落，行吓走下就一日，好舒服。

豪華露營 #gampling 就咁完結，跟住酒店安排車返清邁，開始另一個旅程，就係去藍、白、黑廟。

營地地址：14/2 หมู่บ้านหนองหอยเก่า ห่างจากม่อนแจ่มเพียง 1 กิโล แม่แรม Mae Rim District, Chiang Mai 50180泰國

#尋找你的旅行背包 #清邁 #湄林 #豪華露營

酒店/景點/美食個人分享

想睇日本最早櫻花一定要到伊豆河津町。大概二月中至三月中旬，河津地區遍佈河津櫻，睇過官網就知道好靚。

封關前 （3年了⋯⋯）曾經飛東京，專誠睇河津櫻。

由東京出發，乘坐「特急湧子號」直達河津站，大約2小時40分。車費好貴，單程約350港幣。睇河津櫻真係要下定決心。

抵達河津站經已中午。河津站聚集唔少賞櫻的日本人，路旁有攤檔擺賣當地生果、魚乾，相信遲啲會更熱鬧。

賞櫻地點：我主要行河津站旁的「河津川」。川旁櫻花隧道大概伸延4公里，呢度遊客比較多。近望河津櫻花睿較大，更粉色。村民會在兩旁擺賣水果、蔬菜，特式小食，行到攰可以填肚，不過真係好難搵垃圾桶😂。

行遠少少，可以睇到「河津櫻原木」，即第一棵河津櫻樹，原木大約有60年樹齡。坐JR 到下站「金井浜海岸」，遊客較少，可以盡情欣賞河津櫻。

伊豆好快入晚，店舖六點前會關門。車站附近搵食易，食完晚餐，再賞夜櫻。

返回河津川，天色灰濛濛，不過射燈照著川道兩旁，方便欣賞夜櫻。可惜伊豆近海，天氣變化大，不久就狂風大雨，遊人係少咗，但影唔到夜櫻靚相。🤦‍♂️

住宿建議提早預訂。記得出發前三，四個月河津站附近酒店已經爆滿，只訂到「金井浜海岸」站嘅小酒店，不過比我喺生庭式酒店食到著名嘅金目錭，好正。車站旁邊都有好幾間酒店，例如今井濱東急酒店，價錢偏貴，不過對住海岸，景色一流；兩日都食酒店自助早餐，正。

如果喺伊豆留耐啲，可以到熱海浸溫泉♨️或者遊覽「大室山」，唔會另你失望。

東伊豆除了到「#熱海」浸溫泉，亦可以去「大室山」和「城崎海岸」睇風景。沿着城崎海岸一路行，飽覽伊豆同太平洋相連的海岸線。

去 #誠崎海岸交通算方便。由東京車站搭乘踊子號或超景踊子號，約2小時30分，就抵達河津車站，再購買巴士套票一次行晒 #東伊豆 著名景點，班次算多，只要留意巴士到站時間表就可以。🚌

誠崎海岸是幾百年前火山岩漿冷卻後形成的自然景觀，長約9公里。入去「門脇燈塔」多為泥路，我就揀咗沿海岸線行，沿途有少少上落坡，海風吹住，唔會好辛苦；沿途周圍好多不同形狀的斷崖同礁岩，只聽到海水打到崖石嘅聲音，加上風聲、樹聲，再走近啲望，原來浪花都可以好靚。❤️❤️

行咗大概30至40分鐘，越來越多人聲傳來，就知道返回社會，到達「門脇吊橋」。吊橋高23公尺，唔算壯觀，行過去「搖搖吓」，下面就係「太平洋」，跳出「維多利亞港」嘅層次，感覺幾得意。

繼續閱讀「東伊豆「城崎海岸」 飽覽太平洋海岸線 +櫻花 +日本自然景觀」

最近有朋友分享喺官塘旺場嘅「密密燒」現已進駐深水埗。「試食親善大使」當然唔會錯過呢次機會為大家介紹吓。餐廳位置於長沙灣、深水埗一帶，去開旺區搵食的話，就會覺得唔「就腳」，不過正因為咁，餐廳空間夠大，環境寛敞，坐得幾舒服，加上抽氣充足，衛生方面絕對係最高級別。

「密密燒」為無限任食，食物寫單任叫，飲品自取，當中有好少見的日本啤酒，加錢可以轉任飲生啤。餐廳員工每次都建議客人落單唔需要點大多，鼓勵大家做「惜食行家」。加上用 QR Code 落單，餐廳確實為環保出力。

講到食物真係冇話可說。首先係烤爐設計讓食材不斷轉動，防止食物水份烤乾，所以食物烤完後仍然保留肉汁。食材又新鮮，牛肉有牛肩胛、西冷、牛板腱多種選擇，其他肉類都有細分各種類。香腸的味道亦不是出面串燒店就食得到，雞軟骨和鴨舌唔係細細粒，烤後脆脆地幾好食。🥩🍖🥓🍗

你可能感興趣：探訪香港最後鹽田：西貢鹽田梓村

蔬菜選擇多，首選菠蘿、蒜頭和秋葵，菠蘿燒後帶點酸甜，非常醒胃，朋友真係食咗好多。個人比較喜歡烤蒜頭，一來比較少見，而蒜頭亦多食有益。在菜單中亦感受到老板對食物質量及客人健康考慮都幾堅持。其實，識食都要食得健康，新鮮肉類簡單只用幾粒鹽，就能帶出鮮味。🥬🧄🧅🥔

任食2.5小時，每位$250有找，朋友話不收加一，性價比極高。每枱備有自拍桿，只可以講老板真係好識做宣傳。👏👏👏

小結

初時以為「密密燒」類似韓式燒烤，所以冇大冀望，不料喜出望外，烤爐設計令食物味道加分不少。唯一缺點是沒有特色食材，讓客人記在心。

---

地址：深水埗東京街50號地舖（顯示地圖）
電話：26234523
營業時間：星期一至日6pm-11:30pm

---

下一篇：食得安心-旺角康得思酒店自助餐體驗

疫情下留港過年，想行山消磨時間，但又怕太困難？可以嘗試由女婆尋梅到北港，沿路欣賞馬鞍山風景，好適合行山初哥。之後到西貢碼頭嘆海鮮，再乘小船去「香港小豆島」的橋咀島，暢遊西貢大半天，在疫情結束前玩盡香港好地方。

路線詳情

黃泥頭→花心坑→女婆坳→梅花古道→梅子林村→茅坪→北港路→西貢北港→西貢碼頭

全長：6公里

需時：約4小時

難度：2/4

由沙田市中心巴士總站乘搭九巴83K直達黃泥頭出發，路經花心坑、女婆坳到梅子古道(可由古道上石路到陽元石)。再沿石道登上茅坪，經茅坪休息處和屋場竹林，下山到達北港，以西貢碼頭為终點。全程多為石道，但如果要去陽元石，有一小段路要靠石旁繩索，最好有心理準備。此外，茅坪到北港的下坡路碎石較多，比較難走，途中亦沒有補給站，必須帶備足夠食水。筆者屬行山初哥，亦可以3小時行畢全程。路線被國際攀山聯盟 (UIAA) 評為「普通難行」，適合一些想向小難度挑戰的朋友。

途中遇見一位老村民，他講到女婆坳原名「簍婆坳」，因為山上石頭貌似背負竹簍的女子而命名，後翻譯為「女婆坳」。

聽他說，茅坪往時曾建村落，但現今眼見已成頹垣敗瓦，到處都是野草樹木。

到達西貢碼頭，可以在海鮮街食飯，稍作休息。如果想到橋咀島，可向碼頭的小攤位詢問，約半小時一班船，船票不貴，值得一去。

乘街渡到橋咀島只需十多分鐘。橋頭島上沿岸有出名的「菠蘿包石」，亦有泳灘、燒烤場和郊野公園。在石徑漫步嬉水，感覺好似去了日本小豆島。

小結

早上由黃泥頭村出發，在中午就能抵達西貢碼頭。在海鮮街吃吃海鮮，再考慮到橋咀島一遊。雖然行山需要一定體力，但沿途風景優美，值得一去。

---

你可能感興趣：重溫舊香港故事：發掘西貢鹽田梓的客家文化

文章亦見於 U BLOG